Pyar Dhoondhta Hoon…

Ek roz pehle chhod gaya tha mujhe koi inhi tanha raahon pe,
Mit chuki ek ummid liye bebas aankho me karaar dhoondhta hoon.

Har taraf muskurate hai chehre aur khushiyan bikhri si hai,
Beraham si kishmat liye main bahaar dhoondhta hoon.

Kaise maan lu ki ish kadar chhin jaaegi mujhse meri zindgi ek din,
Teri tasveer ko seene se lagaye teri aankho me wahi iqraar dhoondhta hoon.

Jo mere maathe pe sikan dekh he mujhe seene me chhupa leta tha,
Aaj ansu bhari aankhe liye bichhda hua voh yaar dhoondhta hoon.

Ab bhi jaata hoon ush kinare pe jahan fizaon me teri khushbu basi hai,
Un masoom si hawao me teri aahat main kayi baar dhoondhta hoon.

Saath waqt ke rishton se bahut door jaa chukka hoon main,
Matlab ki ish duniya me ek khoya hua sansaar dhoondhta hoon.

Ek tere he pyar pe ab kuch vishvaas baki reh gaya hai maa,
Aaj dar ke saaye me tera wohi bachpan ka dulaar dhoondhta hoon.

Ab kahan ehsaas hota hai in saanso ke chalne ka mujhe,
Ek zinda laash hoon main, ab toh bas apni mazaar dhoondhta hoon.

Toh kya hua jo seham jaata hai ye dil pyar ke naam se he ab,
Dil he me jo kho gayi hai, un yaadon me aaj bhi pyar dhoondhta hoon…

#Tanha #Ehsaas
#TanhaEhsaas

Alone on Sunset

Kyun…

Kyun karte ho eitbaar is zindgi pe itna,
Ek din yahi tumhe dhokha de jaaegi.
Umar bhar kosis ki apno ko khush rakhne ki tumne,
Ek he pal me ye zindgi unhe rone ka mauka de jaaegi.

Kyun intezaar karte ho khushiyo ke aane ka tum,
Har lamhe ko tum khushnuma banate kyun nahi.
Jab khud zindgi nahi rukti maut se pehle,
Phir se aashiyana tum sajaate kyun nahi.

Kyun har baar kaanto ko he dekha karte ho,
Ye bhi toh hai hissa usi daali ka jis par phool khilte hai.
Kyun chhod kar chale jaate ho yun rishto ko adhura,
Beraham duniya me ye rishte kahan har baar milte hai.

Kyun dete ho ilzaam yaado ko apni ish haalat ka,
Yaadein kab kehti hai ki mujhe aankho se baha lo.
Ye saath beete lamhe toh sacchi daulat hai is zindgi ki,
Isey aankho se bayan na karo bas dil me chhupa lo.

Kyun kehte ho usey bewafa jo aaj saath nahi,
Shayad uski aankho me bhi kabhi nami rahi hogi.
Kyun har baar khud ko jayaz thehrate ho tum,
Uski nazron se dekho tumhare pyar me he koi kami rahi hogi.

Kyun baandhna chahte ho har rishte ko tum,
Jise dil me basaya hai usey bhi kya khone se darte ho.
Kya hua jo voh chal dega apni raaho pe ek din,
Tum kya uski yaadon me palke bhigone se darte ho.

Kyun har baar nazdikiyon ko he pyar kehte ho,
Kisi ki yaadon me palke gili hona bhi toh pyar hai.
Kyun har baar paane ki he chahat rakhte ho tum,
Bebas si aankhe liye kisi ko khona bhi toh pyar hai.

Tum kabhi na khelna kisi nazuk se dil se yaaron,
Jaane kahan koi zakham yuhi khula reh jaaye.
Baant na sako khushi toh kisi dard ki vajah toh na bano,
Khuda jaane aakhiri waqt pe konsa gila reh jaaye.

Kyun jeete nahi is zindgi ka har pal qayamat tak,
Ye lamha jo beet gaya ye kahan laut kar aana hai.
Is jahaan me ek pal bhi kisi ke liye rukta nahi dost,
Yahi riwaaz hai duniya ka aaj mujhe toh kal tumhe jaana hai…

#Tanha #Ehsaas
#TanhaEhsaas

Silent lonely girl

Kuch Ghar Bana Liye…

Dil me dard tha par chhupana pada hume,
Palko pe nami liye he hum muskura liye.

Humare naseeb me kahan thi khushbu yaaron,
Humne toh sookhi daaliyon se he dil behla liye.

Na baahon ka sahara tha na sukoon bhari god koi,
Humne toh raahon par pattiyon se he chadar bana liye.

Jis gaanv me kabhi masumiyat ghuli hoti thi fizaao me,
Aaj wahin logon ne kuch maikhane saja liye.

Humare askon ka saara mohalla mazak banata tha,
Toh humne tanhaai me ro ro kar saare ansu sukha liye.

Ab khanjaro me voh tadpan kahan reh gayi hai dost,
Zakhmo ko hara karna tha toh raahon se pathar utha liye.

Armaano ka kya hai inhe toh yun bhi tootna he tha,
Accha he kiya jo usne ye adhure sapne chura liye.

Kaun jaane kis raah se ho kar aa jaaye voh maut,
Humne shamshaan par he kuch ghar bana liye…

#Tanha #Ehsaas
#TanhaEhsaas

Lonely home at mistery morning

Sitam…

Ek muddat hui tujhe dekha nahi maine,
Milne par mere ansuo ka haal puchhna jaroor.

Ab toh khuli aankho se he sone laga hu main,
Jab bhi neend aaye mere khwabo me aana jaroor.

Ab lagta hai rona he bhul chuka hoon main,
Tum bas ek baar mujhe rulana jaroor.

Log kehte hai ab main mar chuka hoon,
Tum mujhe zinda hone ka ehsaas dilana jaroor.

Gamon ki kitaab likhni hai aur syahi hai mere ansu,
Par tum har pal khushiyo me muskurana jaroor.

Baad maut ke ek halki muskurat rahegi chehre par,
Bas ek baar pyar se mera sir sehlana jaroor.

Teri raah dekhte-2 aaj khamosh ho gayi meri aankhe,
Tu meri khuli aankho se ek baar nazre milana jaroor.

Tumhari har ek muskaan hifazat se sambhali hai maine,
Meri bhi kuch nishaniyo pe tum apna haq jatana jaroor.

Jeete ji milna ab mumkin na hoga e humnafaz,
Mazaar par meri tum aana jaroor.

E khuda zindgi ko toh maine he khoob saza de di,
Tu meri rooh par julm dhana jaroor.

Kya karu tere sitam ke liye toh ye zindgi kam pad gayi,
Bas ek baar tu mujhe fir se insaan banana jaroor…

#Tanha #Ehaas
#TanhaEhaas

Tears in eye

Mere Humsafar Kyun Nahi Aata…

Khwabon ke intezaar me raaton se pyar hua,
E humnafaz tu aantho pehar kyun nahi aata.

Suna hai pariyon ke desh tak jaate ho tum,
Toh ek mere he sahar kyun nahi aata.

Ek kashti ke intezaar me sahil ke ho gaye,
Zindgi me ban kar tu ek lehar kyun nahi aata.

Teri talaash me jaane kitni he raahein badli,
Sab mila par jaane tera he ghar kyun nahi aata.

Logon ko zakham bhula kar fir haste dekha hai,
Jaane mujhme unka asar kyun nahi aata.

Tum is kadar apne se he lagte ho mujhe,
Par tere chehre me voh nazar kyun nahi aata.

Teri khatir kuch saanse sambhal rakhi hai,
Kareeb tu he mere humsafar kyun nahi aata…

#Tanha #Ehsaas
#TanhaEhsaas

Left alone angel

Khamoshi…

Khamosh hai ye manjar, khamosh he raat hai,
Khamosh hai baadal, aur khamosh he barsaat hai.
Kabhi intezaar bhi shor machaya karta tha,
Fir aaj kyun ye khamosh humari mulakaat hai.

Kya kahu ki tujhe kitna yaad karta hoon,
Tera naam le kar he toh aur jaam bharta hoon.
Aaj bhi jaata hu wahan, jahan kabhi saath baithe the,
Pehle yaadon me muskurata hu, fir ro ro kar marta hoon.

Jitna bhi jaau door tujhse utna he tere pass hota hoon,
Na din ka thikana koi, na raaton ko main sota hoon.
Pehle apno ke dar se mehfilon me muskurata toh tha,
Teri yaad me ab toh main bhari mehfilon me rota hoon.

Kabhi lagta hai tu mere pass he hai kahin,
Sayad kal he toh dekha tha tujhe yahin.
Aur fir toot jaate hai khwab aur aati hai haqiqat,
Ki teri yaadon ke siwa mere pass kuch bhi nahi.

Kabhi saath chala karte the hum in raahon per,
Aur so jaati thi tum rakh kar sir in baahon per.
Tere khatir har rishte se door hota chala gaya,
Aaj koi nahi hai lagane ko marham meri aahon per.

Aakhir tum mujhe yaad itna kyun aate ho,
Aa kar khuwabon me fir laut kyun jaate ho.
Mana ki zindgi ruk nahi sakti intezaar me,
Door ho kar bhi tum mujhe itna kyun tadpate ho.

Voh pehli mulakaat aaj bhi mujhe yaad aati hai,
Voh sehmi teri aankhe aaj bhi dil me utar jaati hai.
Kaise mita doon un pyar ke khushnuma lamho ko,
Sach aaj bhi meri dhadkane tujhe he pass bulati hai.

Rozana baithta hoon tanhaai me tujhe yaad karne ko,
Ek akela sharabi hoon poore maikhane ko aabaad karne ko.
Ab hothon pe hasi na rahi aur gam bhi mujhse haar chuke hai,
Baki hai toh bas zindgi, teri yaadon me barbaad karne ko.

Har aahat me tujhe mehsoos karne ki aadat kya paayi hai,
Khuda ki banayi har cheez me chhupi ek bewafai hai.
Ek muddat tak baithta hu dar pe tere intezaar me,
Jab karta hu band dar toh ye hawayein aur jor se takrayi hai.

Pal bhar me pyar bhare lamhe suhane guzar gaye,
Ek teri he surat dekhe kayi zamaane guzar gaye.
Besudh teri yaadon me raahon pe pade rehte the,
Samajh ke laash kayi apne toh kayi begane guzar gaye.

Musafir hu ush raah ka jiski majil ka thikana nahi,
Samajh ke khilona dil tod dena, ye khel aaj bhi purana nahi.
Intezaar tab bhi tha aur aaj bhi kiya karta hoon,
Fark ye hai, ki meri raahon per ab tera aana jaana nahi.

Har chehre me ab tum he nazar aate ho,
Yaad toh tum mujhe aantho pehar aate ho.
Jab sochta hu ki kuch pal ke liye tumhe bhool jaau,
Dil ke is samandar me, banke tum lehar aate ho.

Aaj bhi hu un raaho pe bina mude jahan se tum chal diye,
Jo haste the kabhi waqt ne voh saare nazare badal diye.
Socha tha waqt ke saath zakham ye bhar jaaega,
Zindgi ne zakham he zakham mujhe har pal diye.

Tere bas me ho to bhula de, main toh bhool paaunga nahi,
Fikar na kar zamane ki, laut ke tere dar pe aaunga nahi.
Sajaya tha pyar se jo gharonda aaj bikhar chuka hai voh,
Fir kabhi mahobbat ka aashiyana main basaunga nahi.

Paane ki chahat kho kar, phaili dil me ek udaasi hai,
Baitha hu dariya kinaare, par rooh meri pyaasi hai.
Kabhi log mehfilon me humari zinda-dili ki misaal dete the,
Par aaj meri pehchan labon pe tehri ye khamoshi hai…


Tere Bina…

Jee raha hai tera har pal mere bina,
Pooch kar toh dekh halat kya hai meri tere bina.

Voh raahein jin par saath chala karte the hum,
Aaj sannaate ki gawaah bani hai tere bina.

Kabhi jin mehfilon ki shaan hua karte the hum,
Aaj roti hai voh dekh kar mera haal tere bina.

Kabhi chandni ke saaye me raat guzar jaati thi.
Aaj darta hoon roshni ke naam se bhi tere bina.

Tere saath toh kayi toofaan bhi jhel liye the maine,
Par aaj hawayein bhi chot pahuchati hai mujhe tere bina.

Voh gulshan voh nazaare, voh dariya aur voh kinare,
Aaj toh sehmi hai har boond saagar ki tere bina.

Kabhi jis aashiyane ko sajaya tha tere khayalon se,
Voh aaj tinka-tinka bikharta he ja raha hai tere bina.

Pehle tere saath rehta tha har pal me,
Aaj bheed me bhi tanha rehta hoon tere bina.

Us waqt askon se door tak ka waasta na tha mera,
Aaj muskurane ki kosis me he ansu aa jaate hai tere bina.

Pehle jo dhadkane tere dil ke saath dhadakti thi,
Aaj kayi sawaal karti hai dekh kar tanha mujhe tere bina.

Kabhi ye dil jo kayi muskurahaton ki vajah hota tha,
Aaj yaadon me ghut-ghut kar rota hai tere bina.

Kabhi tum mujhe neend se jagaya karti thi,
Aaj jaagti aankho se intezaar karta hoon tere bina.

Kabhi maikhane ke saamne se bhi guzara na karta tha,
Aur aaj band pade maikhano ki sidhiyon pe raat kat ti hai tere bina.

Kabhi band aankho se he dhundh liya karta tha tujhe,
Aur aaj apne ghar ka raasta bhi logon se puchhta hu tere bina.

Pehle is duniya me ek apnapan sa lagta tha,
Aaj apna saaya he mujhe qatil lagta hai tere bina.

Kabhi khuda se sazde me ek adad umar maanga karta tha,
Par aaj toh bojh lagta hai har pal zindgi ka tere bina…

Previous Older Entries

Follow

Get every new post delivered to your Inbox.

%d bloggers like this: