KHAMOSHI…

Khamosh hai ye manjar, khamosh he raat hai,
Khamosh hai baadal, aur khamosh he barsaat hai.
Kabhi intezaar bhi shor machaya karta tha,
Fir aaj kyun ye khamosh humari mulakaat hai.

Kya kahu ki tujhe kitna yaad karta hoon,
Tera naam le kar he toh aur jaam bharta hoon.
Aaj bhi jaata hu wahan, jahan kabhi saath baithe the,
Pehle yaadon me muskurata hu, fir ro ro kar marta hoon.

Jitna bhi jaau door tujhse utna he tere pass hota hoon,
Na din ka thikana koi, na raaton ko main sota hoon.
Pehle apno ke dar se mehfilon me muskurata toh tha,
Teri yaad me ab toh main bhari mehfilon me rota hoon.

Kabhi lagta hai tu mere pass he hai kahin,
Sayad kal he toh dekha tha tujhe yahin.
Aur fir toot jaate hai khwab aur aati hai haqiqat,
Ki teri yaadon ke siwa mere pass kuch bhi nahi.

Kabhi saath chala karte the hum in raahon per,
Aur so jaati thi tum rakh kar sir in baahon per.
Tere khatir har rishte se door hota chala gaya,
Aaj koi nahi hai lagane ko marham meri aahon per.

Aakhir tum mujhe yaad itna kyun aate ho,
Aa kar khuwabon me fir laut kyun jaate ho.
Mana ki zindgi ruk nahi sakti intezaar me,
Door ho kar bhi tum mujhe itna kyun tadpate ho.

Voh pehli mulakaat aaj bhi mujhe yaad aati hai,
Voh sehmi teri aankhe aaj bhi dil me utar jaati hai.
Kaise mita doon un pyar ke khushnuma lamho ko,
Sach aaj bhi meri dhadkane tujhe he pass bulati hai.

Rozana baithta hoon tanhaai me tujhe yaad karne ko,
Ek akela sharabi hoon poore maikhane ko aabaad karne ko.
Ab hothon pe hasi na rahi aur gam bhi mujhse haar chuke hai,
Baki hai toh bas zindgi, teri yaadon me barbaad karne ko.

Har aahat me tujhe mehsoos karne ki aadat kya paayi hai,
Khuda ki banayi har cheez me chhupi ek bewafai hai.
Ek muddat tak baithta hu dar pe tere intezaar me,
Jab karta hu band dar toh ye hawayein aur jor se takrayi hai.

Pal bhar me pyar bhare lamhe suhane guzar gaye,
Ek teri he surat dekhe kayi zamaane guzar gaye.
Besudh teri yaadon me raahon pe pade rehte the,
Samajh ke laash kayi apne toh kayi begane guzar gaye.

Musafir hu ush raah ka jiski majil ka thikana nahi,
Samajh ke khilona dil tod dena, ye khel aaj bhi purana nahi.
Intezaar tab bhi tha aur aaj bhi kiya karta hoon,
Fark ye hai, ki meri raahon per ab tera aana jaana nahi.

Har chehre me ab tum he nazar aate ho,
Yaad toh tum mujhe aantho pehar aate ho.
Jab sochta hu ki kuch pal ke liye tumhe bhool jaau,
Dil ke is samandar me, banke tum lehar aate ho.

Aaj bhi hu un raaho pe bina mude jahan se tum chal diye,
Jo haste the kabhi waqt ne voh saare nazare badal diye.
Socha tha waqt ke saath zakham ye bhar jaaega,
Zindgi ne zakham he zakham mujhe har pal diye.

Tere bas me ho to bhula de, main toh bhool paaunga nahi,
Fikar na kar zamane ki, laut ke tere dar pe aaunga nahi.
Sajaya tha pyar se jo gharonda aaj bikhar chuka hai voh,
Fir kabhi mahobbat ka aashiyana main basaunga nahi.

Paane ki chahat kho kar, phaili dil me ek udaasi hai,
Baitha hu dariya kinaare, par rooh meri pyaasi hai.
Kabhi log mehfilon me humari zinda-dili ki misaal dete the,
Par aaj meri pehchan labon pe tehri ye khamoshi hai…


TERE BINA…

Jee raha hai tera har pal mere bina,
Pooch kar toh dekh halat kya hai meri tere bina.

Voh raahein jin par saath chala karte the hum,
Aaj sannaate ki gawaah bani hai tere bina.

Kabhi jin mehfilon ki shaan hua karte the hum,
Aaj roti hai voh dekh kar mera haal tere bina.

Kabhi chandni ke saaye me raat guzar jaati thi.
Aaj darta hoon roshni ke naam se bhi tere bina.

Tere saath toh kayi toofaan bhi jhel liye the maine,
Par aaj hawayein bhi chot pahuchati hai mujhe tere bina.

Voh gulshan voh nazaare, voh dariya aur voh kinare,
Aaj toh sehmi hai har boond saagar ki tere bina.

Kabhi jis aashiyane ko sajaya tha tere khayalon se,
Voh aaj tinka-tinka bikharta he ja raha hai tere bina.

Pehle tere saath rehta tha har pal me,
Aaj bheed me bhi tanha rehta hoon tere bina.

Us waqt askon se door tak ka waasta na tha mera,
Aaj muskurane ki kosis me he ansu aa jaate hai tere bina.

Pehle jo dhadkane tere dil ke saath dhadakti thi,
Aaj kayi sawaal karti hai dekh kar tanha mujhe tere bina.

Kabhi ye dil jo kayi muskurahaton ki vajah hota tha,
Aaj yaadon me ghut-ghut kar rota hai tere bina.

Kabhi tum mujhe neend se jagaya karti thi,
Aaj jaagti aankho se intezaar karta hoon tere bina.

Kabhi maikhane ke saamne se bhi guzara na karta tha,
Aur aaj band pade maikhano ki sidhiyon pe raat kat ti hai tere bina.

Kabhi band aankho se he dhundh liya karta tha tujhe,
Aur aaj apne ghar ka raasta bhi logon se puchhta hu tere bina.

Pehle is duniya me ek apnapan sa lagta tha,
Aaj apna saaya he mujhe qatil lagta hai tere bina.

Kabhi khuda se sazde me ek adad umar maanga karta tha,
Par aaj toh bojh lagta hai har pal zindgi ka tere bina…

TERA HONA HAI MUJHE…

E baarish, teri in boondon ko mere gharonde se kahin door le ja,
Aankho se behte paani me abhi toh khud ko bhigona hai mujhe.

E saqi, tu mujhe hosh me kabhi aane na dena,
Abhi toh kisi ki yaadon me aur khona hai mujhe.

E neend, tu mujh per apna waqt jaaya na kar,
Ab toh qabar me he jee bhar ke sona hai mujhe.

E muskurahat, mere hoton pe ab tera guzara na hoga,
Abhi toh zindgi me jaane kitna rona hai mujhe.

E maut, abhi kisi aur chokhat pe tu apna khel dikha,
Daag kisi ki bewafai ka abhi dhona hai mujhe.

E humnafaz, zindgi ki baazi chahe toone jeet li ho,
Par baad maut ke he sahi, tera hona hai mujhe.

GUNEHGAAR…

Marna chaha toh mujhe qatil na mila,
Mere dard me koi mujhe shamil na mila.
Ab kyun kisi ki talaash me jau kahin,
Mera dil he pyar ke mujhe kabil na mila.

Apno ke kehne se mainey muskurana suru kiya,
Tanhaayi ke un lamho ko bhulana suru kiya.
Par dekho aaj kya asar hua hai jhuthi muskaan ka,
Ek muddat se sehme mere dil se kisi ne nazrein milana suru kiya.

Jo main muskuraya toh usney iqraar samajh liya,
Dil ka haal sunaya toh usney raazdaar samajh liya.
Isey gunaah kahu ya meri khafa ho chuki kishmat,
Meri is dosti ko usney pyar samajh liya.

Voh saamne aaye toh ussey nazrein churata hu,
Har pal khud ko ussey door kiye jaata hu.
Gila ye nahi ki usney mujhe he kyun chuna,
Dard ye hai ki main khud ko bhi uski jagah paata hu.

Kya batau ki ek shakhs ko mainey abhi bhulaya nahi,
Naye gharonde ka khwab aankho me mainey abhi sajaya nahi.
Ho sakta hai pyar he pyar ke zakhmo ko bharta ho,
Par yaadein bhulane ka marham koi mainey abhi aajmaya nahi.

Beete lamho ko bhulane ke liye pyar main kar nahi sakta,
Dilon se khelne wala jhootha iqraar main kar nahi sakta.
Kabhi na khatam hone waale is safar per chal diya hu main,
Is zindgi ko mahobbat ke hawale har baar main kar nahi sakta.

Mana ki yaadon me ro kar mujhe mila kuch nahi,
Par in beete tanha lamho ka mujhe gila kuch nahi.
Tumhari zindgi me raat ke baad din aata hoga shayad,
Par ek muddat se banjar mere dil me khila kuch nahi.

Sehmi uski saanso ko mere dil-e-bimaar ki vajah kya batau,
Bechain uski aankho ko intezaar ki vajah kya batau.
Ab nafrat ho chuki hai mujhe chahat se,
Par najuk uske dil ko inkaar ki vajah kya batau.

Jab manjil he na rahi toh safar beech me chhod aaya,
Bhar kar dard seene me tanhaayi se rishta jod aaya.
Bas ek he gunaah baki reh gaya tha meri ish zindgi me,
Zakhmi apne haatho se main bhi ek dil tod aaya.

Dil tootne ka jo hai dard mujhe pata hai,
Door se dekhne wala jo hai bedard mujhe pata hai.
Majboor hu main bhi apne dil ke haatho e yaar,
Par tere dil ki halat jo hai mere humdard mujhe pata hai.

Ab kabhi kisi rishte ko chahat ka main naam na dunga,
Apne dil ka haal bayan karta ab koi main paigaam na dunga.
Apne gunahon ki saza ab main khud he chuna karunga,
Ab kahbi apni kishmat ko berehmi ka main ilzaam na dunga.

Mainey apni zindgi ka ek kissa keh sunaya hai,
Ab ye batana apne mujhe gunehgaar kaha tak paaya hai.
App na bata sako toh apne khuda se pooch lena,
Usney sazaa ke liye konsa jariya banaya hai…

MUJHE TO AADAT NAHI…

Ye zindgi ke kis mod par aa gaya hu main,
Khushiyo par ek chhaya ban kar chha gaya hu main.
Yakeen nahi aata ki ye wahi viraane hai,
Jahan kuch tanha geet ga gaya hu main.

Apni haseen tanhaayio se mujhe ab wafa ho gayi,
Par jaane kyun saari duniya he mujhse khafa ho gayi.
Ho kar shamil apki khusiyon me hum bhi muskuraye the,
Fir kyun tumhari ye nazrein aaj mujhse bewafa ho gayi.

Apni khushiya main kisi se chhupata nahi,
Aur apne gamon ko baantna mujhe aata nahi.
Muskurahat toh sabhi sahej lete hai dil mein,
Par ansu ko toh pal bhar ki panah koi de paata nahi.

Chahe aaj tujhe pyar se apne pass bulaegi,
Par ek din ye bewafa zindgi tera saath chhod jaaegi.
Karni hai toh kar wafa ush haseen maut par,
Jo tujhe har haal me apna kar tera saath nibhaegi.

Ab khwaish nahi mujhe kisi ka pyar paane ki,
Tamanna hai toh bas askon me doob jaane ki.
Bin pyar bhi dil lagaye jaate honge kahin,
Par mujhe toh aadat nahi ek dhokhe se dil behlaane ki.

Dil bhar aaye dosti se toh isey nibhana nahi,
Aur na bata kar mera dil dukhana nahi.
Mana vajah toh nahi teri khushiyo ki hum,
Par apne gamon me hume bhulana nahi.

Is tanha safar ke dard toh mainey abhi sahe he nahi,
Toot kar is dil ke kayi armaan toh abhi bahe he nahi.
Meri khushiyo me saath nibhane waale Aye humsafar,
Mere gamon se katra kar toh tum abhi gaye he nahi.

Ab ummid na karo mere badal jaane ki,
Mujhe aadat nahi khushiya sajane ki.
Tumhara waqt har zhakham bhar deta hoga shayad,
Par mujhe toh aadat nahi beete lamhe bhulane ki…

ZAKHMI NA KARNA…

Raat bhar barsa hai mere shahar me pani,
Aasma bhi roya tujhe yaad karke.
Ek humara he dil pyasa raha,
Bheega toh woh khuda bhi tujhse fariyaad karke.

Roshni bhi aayi thi mehkaane tere ghar ko,
Par toone band kar liya dar hume yaad karke.
Kaash toone ek pal ko toh ye socha hota,
Ki laaye the hum woh roshni kitni fariyaad karke.

Ek phool rakh aaye the hum toh tere dar pe,
Kaash usey toone yu na feka hota hume yaad karke.
Khushboo toh kabhi bewafa na thi,
Fir kyun chal diye tum is gulsan ko barbaad karke.

Kuch nazuk palon ki saugaat hai ye zindgi,
Isey yu zakhami na karna hume yaad karke.
Khushiya sahej ke rakhna apne dil me,
Hum to chale jaaenge kabar me, teri khushi ki fariyaad karke.

HUMARE NAAM KEHNA…

Khuda jaane fir mil na sake zindgi ke khel me,
Kabhi aaye jo khwabon me toh salaam kehna.
Jo kabhi dhoondh lo humein is duniya me,
Toh haal-e-dil bayan karta ek paigaam kehna.

Waise toh na ban paaye kisi khushi ki vajah kabhi,
Agar samjho kabil, toh layak humare koi kaam kehna.
Chahe na rahe ho hum dil ke utne acche,
Par na hai bure dosti me, sareaam kehna.

Agar toote ye dil tumhara kabhi,
Toh roshan subah ko bhi shaam kehna.
Mil kar baithenge us gamon ki mehfil me,
Jaha hum apko aur app humein ek jaam kehna.

Koi keemat nahi hai is dil ki zamane me,
Agar jaao bazaar toh isey nilaam kehna,
Jo kabhi ruk jaaye ye saanse humari,
Toh ashkon me bheega ek sher humare naam kehna…

JO MAIN NA KEH PAAYA VO MERI GAZAL KEH GAYI…

Jo hakiqat main na keh paaya,
Vo kalam se nikli gazal keh gayi.
Tanhaai me kisi ka saath na mila,
Ek teri yaad thi voh bhi aankho se beh gayi.

Zindgi khushiyo ka kafila hai shayad,
Par meri har khushi tum saath le gayi.
Jo kuch thodi khushiyan baaki thi,
Vo teri khushi ki dua me reh gayi.

Maine toh chahi thi kuch boonde tere saath ki,
Par zindgi mujhe tanhaayi ka saagar de gayi.
Duniya ne bhi kuch kami na rakhi,
Door ja kar mujhe bewafa keh gayi.

Har dukh saha teri khushi ke khatir,
Par aaj tu he aa kar diwana keh gayi.
Shayad ek diwana he hoon main,
Jo zinda toh hai par zindgi tum saath le gayi.

Tum toh tanha chhod ke chali gayi,
Aur na poore hone waale khawab aankho me de gayi.
Neend ka kya hai, khuli aankho se so loonga,
Par kya khata in saanso ki jinme teri he khusboo reh gayi..

PHIR WAHI TUFAAN AAYA…

Kuch is tarah sookhi thi zindgi meri,
Jaise ek jhonkha kuch patte udaa laya ho.
Aur rangon ke liye kuch is tarah tarasi zindgi,
Ki mano khuda ne ek he rang banaya ho.

Is kadar sooni thi raah dil ki,
Mano dil par kisi sanaate ki chhaaya ho.
Aur kuch aise bikhre the armaan dil ke,
Jaise tufaan koi bas abhi aaya ho.

Par shayad ush khuda ki kuch aur he razaa thi,
Uthai jo nazar toh roshan har ek fizaa thi.
Aankhe thi nashili, dil jhoom raha tha,
Pass hothon ke ab muskurane ki ek vajah thi.

Jahan kabhi sookhe patte udaa karte the,
Aaj vahan baarish ki boonde gaa rahi thi.
Koi aahat he na hui jis veeraane me kabhi,
Dhadkane bhi aaj vahan ek naya saaj suna rahi thi.

Aaj dil ke baag me ek khubsurat phool khila hai,
Dil par dastak dene wala ek pyara sakhas mila hai.
Kehte hai khuda toh pathar dil hota hai,
Par jo mujhe mila vo ussi ki ibaadat ka silaa hai.

Dhadkan ne kaha kuch yun muskura kar,
Ki humsafar tera tere pass he kahin hai.
Dekha karta tha tu jise roz khwabon me,
Jo hai khada saamne, sakhas wahi hai.

Tabhi fir wahi tufaan kahin se aaya,
Samet pata khushiya jo kismat ne kuch mohlat di hoti.
Abhi toh hasna seekh he raha tha main,
Rehti muskurahat agar khuda ne ye dolat na li hoti.

Us phool ka bhi thik se deedar kar pata,
Jo khuda ne haseen ghadiya yun na li hoti.
Yuh agar todna he tha jaam khushi ka,
Toh vo mehfil-e-noor kaash na di hoti.

Ab na hogi vo khushi teri ibaadat me mujhe,
Yuhi meharbaan rehna main tera har gam liye ja raha hu.
Khush hu main ab toh teri tanhaayi me bhi,
Saanse toh nahi hai par jeeye ja raha hu.

E khuda toone kiye the sitam meri khushiyo pe,
Dekh, dard aaj main teri zindgi ko diye ja raha hu.
Kabhi tanhaayi me bhi na gaya tha jis mehfil me,
Aaj tere fareb par wahan jaam pe jaam piye ja raha hu…

ABHI BAAKI HAI…

Jaaye na ab koi ish tarah is mehfil se,
Peene ko jaam aakhiri abhi baaki hai.
Roothi nahi hai mahobbat mujhse,
Ek tukda dil ka ab bhi mere pass baaki hai.

Labon pe mere tujhe muskurahat dikhti hogi,
Par dil pe zakham ab bhi kuch baaki hai.
Besak, khwab me ab na koi aata ho,
Par yaadon me ab bhi ek tasveer baaki hai.

Kaise so jaau main befikar ho kar,
Palko me kuch najuk khawab ab bhi baaki hai.
Majboori ka aalam ye hai ki jaag bhi nahi sakta,
Sapna tootne ka dar bhi toh abhi baki hai.

Aisa lagta hai ki vo mere kareeb he hai,
Ya shayad unki khushboo he abhi tak baaki hai.
Kyun har chehre me unka he akash nazar aata hai,
Kya dil ko ab bhi kuch ummid baaki hai.

Har pal roshan rahe unka vo aashiyana,
Aane ko zindgi me unke ab bhi kuch khushiya baaki hai.
Kisi raah pe jo mil jaaye voh toh kehna,
Kuch saanse zindgi ki ab bhi ek sakkhs ke pass baaki hai.

Peene de saaki mujhe ye aakhiri jaam,
Kuch boonde ab bhi isme baaki hai.
Khuda jaane kal fir na aa saku teri mehfil me,
Aane ko vo haseen maut bhi toh abhi baaki hai…

Previous Older Entries

Follow

Get every new post delivered to your Inbox.

%d bloggers like this: